台文戰線 第15號 【時代的筆專輯】

　　台文戰線目nih仔來到第15號矣，會做這個專輯，尚主要是受著本輯登出的胡民祥佮施俊州的訪談記錄感動，佇內面，我看著兩個世代的對話，文字透過胡民祥先生的記持，浮刻佇時間的大海流。我知影，彼毋但是胡民祥先生的記持，彼是伊的時代，伊所代表的彼個世代台灣人的時代；是受壓迫的時代，嘛是反抗的時代；是濟濟屈辱的時代，嘛是濟濟尊嚴的時代；是無欠缺妥協者的時代，嘛是無欠缺勇者的的時代；記持的力量就是按呢，當咱共讀了，咱雄雄發見，伊的時代，毋但牽涉伊的世代，閣是咱台灣人精神演進的重要一跤步。因為記持，因為筆，時代的光tsio佇咱的眼前，當咱軟汫的時，伊喝聲，當咱sau聲的時，伊呼喊，伊予咱較濟的機會想著勇氣佮向望。

　　窮實講，佇台灣，有勇氣、有骨氣的作家本底就毋是顯目的身份，甚至，佇人人攏通出冊的時代，「作家」兩字加速塊退化，早著失去成做一個「身份」的條件矣。閣較過份的是有人共伊當做應酬的帽仔，假若牛戴帽去參加豬的party，嘛會使你兄我弟，嘛會使出出入入，嘛會使手牽手做伙跳舞。總是佳哉，毋管按怎，佇時代內底，另外一種無注重外在「身份」的作家，手裡猶閣夯一枝燒loh的筆毋放，怹，當底為著世界的真實認真拍拚。怹，因為這枝筆存在！

　　佇這個時代，假使你閣清醒，假使你有看法，有一個辦法是，請你提出勇氣，共筆夯咧，加入筆的戰線。做伙來！寫！寫出這個時代！