2013 A-Khioh（阿却）賞：台語文學作品集

序言
台語長篇小說－Gíng
台語劇本－語言ê力量
台語劇本－Biàn-tsih內ê春天

 

序言

A-Khiohê長篇小說

陳明仁

　　「小說」這个詞，ài讀文音「siáu-suat」，古早Tsi-ná出現ê「小說」，是儒家phì-siùnnê「非合統治適用ê論說」，品訂為「下流」，kap這時印象ê「小說」無相關。日本人明治維新了後，kā真濟近現代文化詞用漢字造詞，古早日本ê情節故事用「物語」、「補物帳」等ê詞。「文學、小說、散文」意思kap漢字原意干焦小可仔牽連niā-niā，這款詞ài讀文音，散文音「sàn-bûn」。

　　小說佇西方真早就有神話故事，用「novel」這个新奇ê形容詞做名詞，日本翻做「小說」若較無遐長篇--ê，就稱「novelette」，短篇小說就用fiction（想--ê、編--ê、假--ê），做正式ê名。純文學創作通常攏是編故事來舖排創作者ê「ideal」（理想），裝thānn媠ê語言，用各族ê名字符號書寫。各族群讀者對作品ê回應，通常會引起思想ê轉變，「文藝復興」就是咱知ê情境。

　　長篇（novel）、中篇（novelette）、短篇（fiction）有時仔毋是真嚴格ê分類，長、短ê創作質性無完全相仝。古早時代ê世界名著攏規部，讀足久，彼陣ê人無啥gī-niū，較會當專心享受長篇小說。筆者初中ê時，工讀生覕佇圖書館，有時仔嘛偷借轉去讀，學科成績suah真䆀，高中tsiahtio̍h去台北夜間部掛名修學，毋過仝款讀世界長篇小說，回想--起來，也是幸福。

　　現代人時間真kiap，毋是時間ê單位較短，是分配予趁錢抑是心適êgī-niūsiunn濟，長篇小說就較敗市。

　　李江却台語文教基金會是專業ê台語文學運動組織，tshuàn講統治者無欲做，毋過台灣人袂堪得等ê事項，kap別款基金會性質無重疊，佇統治者無重視台語各族母語ê時代，出母語雜誌、組台文讀冊會，設獎勵台語文學獎kap台文學術論文獎賞，資源有限，賞金無濟，嘛佇文學界、學術界予有心--ê重視，這幾年koh增加戲劇文學ê獎項，戲劇佇文學類也是主流之一。

　　2012年起，想講長篇小說若無鼓勵，台語文學koh欠一塊，增設長篇小說賞，koh真正有志士來稿。2012年選出林貴龍ê小說，2013年選邱偉欣ê小說。邱偉欣是青年創作者，伊ê思維有新ê語言佮視野，內容無beh佇遮漏洩，予讀者家己去讀。

　　台灣現況真危險，台語文是台灣弱勢ê堅心守護兼創造者，逐个kīng力相thīn。

「看」兩齣戲－評2013A-Khioh賞「劇本組」

施俊州

　　2013年êA-Khioh賞設「劇本組」，入選兩篇：林貴龍，〈語言ê力量〉；陳廷宣（A-hi），〈Biàn-tsih內ê春天〉。林貴龍，2012年A-Khioh賞長篇小說獎ê得主。A-hi，講有寫詩、出一本散文集（2005），是講伊ê小說散散仔刊，tiānn-tiānn予咱讀著目睭光。講透ki，in攏是小說家ê範。

　　小說家寫劇本無啥毋著，嘛無啥物m毋好。跨文類寫作天公地道，欠跤手ê台語文學界，koh較thang鼓舞這lō「試寫」風氣。講bóng講，文類ê典型小比--一下，tsiah知戲就是戲；劇本寫作，對咱慣勢寫「字」、編意象，慣勢kō「字」講故事ê小說家、詩人來講，的確是挑戰。

　　〈語言ê力量〉ê「下齣」，用半thang光ê紗仔做幕，是規齣較「舞台」ê一場。戲文順順仔kā讀，就知寫作動機、目的無佇舞台，佇語言「教學」－透過口白展覽語言智識；辯話骨是這lō展覽兼娛樂ê手路。語彙、諺語一句仔一句「辯」--落來，免啥物寫劇經驗kap學問。〈語言ê力量〉予咱想著陳明仁佇BONG報、佇海翁《台語教育報》寫ê「專業行話」欄、「心適ê台語」欄，甚至月球唱片ê脫線系列爆笑劇。

　　〈Biàn-tsih內ê春天〉有較小說一-屑-仔。逐家掩名讀這篇，就知A-hi寫--ê。到這陣，台文界有leh寫野球文學--ê，就A-hi一个有代表性。A-hiê野球文本íng-íng掠「球是圓--ê」、「第九局」做criticalpoint，描寫心理、kí-tu̍h弊案。舞台設計、「觀點」誠有野心；戲kámē演--ê，是大問題。論這點，〈Biàn-tsih內ê春天〉毋是小說，是影戲；遐爾有野心ê「觀點」，àikōo鏡頭呈現，tsiah有thang合作者ê編寫動機。

　　吳念真講伊評電影劇本，頭一个標準：看戲ē演bē演--ê。是講，咱嘛有聽過林正盛hē伊ê想法：「ē演bē演--ê，錢摃--落就有」。技術性kap編劇本色ê問題，突顯戲劇教育kap咱ê劇場需求：sòng-hiongê運動脈落，有法度獎勵優質劇本，「咱ê劇場」kám就請ē起優質ê演出？Ah是講，有戲thang「讀」就好？－2014/2/20