粵語西遊記

　　《西遊記》是中國古典小說四大名著之一，講述孫悟空、豬八戒、沙僧保護唐僧到西天取經的故事。他們在漫長的取經路途中經歷九九八十一個劫難，遇上無數妖魔和險阻，最終突破重重難關，取回真經。

　　本書精選《西遊記》原著100回故事中，最為膾炙人口的30個故事，以粵語作改編。讀者可以直接以粵語作親子共讀，也可以藉名著故事感受粵語特色。每篇故事配以原創插畫，以及由香港本地中文老師錄製的講故事錄音。

本書特色

　　●親子互動讀本
　　與孩子一起用日常口語以玩味形式講故事
　　●用粵語讀名著
　　以粵語文字改編四大名著之一的《西遊記》
　　●掃碼即聽名著
　　每章節的故事都有二維碼一掃即可聽粵語音頻

　　1.改編自《西遊記》的原著100章回小說，精選最為膾炙人口的30個故事；
　　2.家長以慣常用語輕鬆讀床邊故事給孩子們聆聽，故事以廣東話字詞編著；
　　3.與孩子邊聽邊讀名著，由香港中文老師錄製講故事式音頻，輕鬆掃碼聽音頻；
　　4.故事輕鬆有趣，配合趣味插圖，香港本土插畫師原創所繪。
 

作者簡介

李家樂

　　生於1998年，是土生土長的90後香港青年。2017年起就讀於香港中文大學工程學系。儘管是個不折不扣的理科人，仍然十分熱愛文字及粵語。深信善用粵語「我手寫我口」的特質編寫文章或故事，是有效保留、傳承粵語文化的方法之一。

第1回  美猴王出世
 
喺好遠好遠嘅東勝神洲傲來國，大海中有一座山，人人都叫呢座山做花果山。喺花果山山頂上面，有一塊仙石，長年累月咁吸收着天地嘅靈氣，享受着日月嘅精華。有一日，仙石突然出現一道裂縫，裂縫不斷擴散開，最後令成塊仙石爆開，只剩低中間一個籃球咁大嘅圓石。微風一吹，塊石頭居然發光，跟着生出手腳，變成一隻有生命嘅石馬騮。啱啱誕生嘅石馬騮，雙眼發出兩道金光，一直射到天庭上面。
 
呢個時候，正喺天庭靈霄寶殿嘅玉皇大帝以及一眾神仙，見到從凡間射上來嘅兩道金光，都覺得非常奇怪。玉皇大帝於是就命令千里眼同埋順風耳兩個將軍，去南天門睇下究竟發生咗乜嘢事。好快，千里眼同順風耳就返來，向玉皇大帝稟告：「玉皇大帝，東勝神洲傲來國海中有一座花果山，山上嘅一塊仙石爆出一隻石馬騮。而照上天庭嘅正正就係呢隻馬騮眼晴發出嘅兩道金光。」玉皇大帝聽到之後，總算鬆一口氣，就話：「原來係天地精華孕育出來嘅產物，咁就一啲都唔出奇啦。」
 
石馬騮誕生之後，每日都同花果山上面嘅其他馬騮同其他動物一齊玩，日子過得好開心。有一日，天氣非常之熱，班馬騮玩到攰喇，就走到山澗裡面沖涼。山澗嘅水又清又涼，所以大家都非常鍾意呢個地方。就喺呢個時候，班馬騮忽發奇想，就諗：究竟咁清涼嘅山水，喺邊到流出來嘅呢？
 
為咗知道答案，一班馬騮就沿着山澗一直向山上面爬，最後終於都爬到源流之處，原來係一幅好靚嘅瀑布飛泉，由高處向下湧流。原來山澗嘅水都係經過瀑布一直流向山腳，再流入大海嘅。喺附近探索咗一輪之後，本來以為班馬騮會心滿意足咁返去休息，點知，活潑好動嘅佢哋又開始喺到諗：瀑布飛泉裡面究竟有啲乜嘢呢？大家都想知道，但瀑布嘅水流好快，而且又危險，在場嘅馬騮都唔敢輕易行埋去。於是乎，幾隻馬騮就提議：「如果邊個有本事穿過瀑布，去另一面打探情況，而又平安無事返出來嘅，佢就做我哋嘅大王啦！」於是石馬騮就跳出來，大聲咁話：「等我來啦！」