作者簡介（按作品順序）
郭頂順（1905-1979）
台中人。淡江中學畢業了後赴日本同志社大學留學，期間也捌到美國遊學。轉台灣了承接家業，擔任過中央製冰會社社長，南瀛新報社的台中佮屏東支局長；經營屏東客運、豐原客運。嘛 佇1940年受按立做長老，改名郭順命；捌擔任真耶穌教會台灣總會董事長。伊也是台中新民商業職業學校、淡江文理學院、台灣基督教兒童福利基金會等機構的創辦人之一。戰前伊捌主編用漢、日文佮白話字發行的《真生命》月刊報，戰後也負責真耶穌教會的「文字強化案」的英文事工；是真成功的企業家，對社會、教育佮文化也有真濟貢獻。
蔡秋桐（1900-1984）
雲林元長人。筆名有愁洞、秋洞、蔡落葉、匡人也、元寮等。公學校畢業了後，就擔任保正25冬，一直到「保甲制度」廢除；捌加入台灣文化協會，嘛捌兼任製糖會社原料委員。伊是「台灣文藝聯盟」的南部委員，也參與創刊文藝雜誌《曉鐘》。伊的新文學創作集中佇1930年代，包括用台灣話文寫作濟濟篇小說作品，也發表袂少新詩、民間歌謠佮故事；戰前戰後攏有參與傳統詩社。1948年捌參加台南縣參議會考察團，赴中國考察一個月。1953年，受知匪不報的罪名予人判罪3冬，2冬後出監，紲就無閣插政治事。
蘇德興
蘇德興，屏東市人，又名蘇維吾。屏東礪社主要的幹部，濟濟漢詩佮擊缽吟詩作發表佇《台灣日日新報》、《台南新報》、《詩報》等；也捌參與台灣文化協會、台灣農民組合、台灣勞働協會等組織。父親蘇允棟是黃石輝的表兄；伊佮黃石輝時常佇講演會擔任辯士，予官方注意佮中止活動。因為佇礪社鼓吹白話文佮新文化運動、提倡文明教育，閣支持左傾的新文協，也致使社內受著當局打擊，後才以「屏東聯吟會」（屏東詩會）之名繼續活動。蘇德興捌擔任礪社文藝集《砥礪集》發行人，集內有鼓吹女權佮自由婚姻等男女平等的觀念，佇當時受著真濟批評。
楊逵（1906-1985）
出世佇台南新化。本名楊貴，也有楊建文、林泗文、公羊、SP、伊東亮、狂人等筆名，是台灣重要的普羅文學作家。1924年留學日本，期間受社會主義影響真深，1927年轉來台灣了後，就積極參加農民運動佮社會運動。1934年以日文小說〈新聞配達夫〉入選東京《文學評論》，是台灣文學作品頭擺受日本文壇注目。1935年創辦《台灣新文學》，戰後創辦《一陽週報》，主編《台灣文學叢刊》等雜誌，積極投入台灣文學佮社會的重建。1949年發表〈和平宣言〉，受判罪12冬。《楊逵全集》共14卷佇2001 年12月出版，楊逵文學紀念館佇2005年開館。
賴和（1894-1943）
彰化人。本名賴河，字癸河，號懶雲。曾署名小逸氏、硬骨漢、走街仔先、癲道人，發表用的筆名有賴季和、逸民、甫三、灰、Ｘ、安都生、浪、Ｔ、玄、賴種菜等。台灣總督府醫學校畢業，佇彰化街仔開設賴和病院；在地人稱呼伊是「彰化媽祖」、「和仔先」。捌擔任台灣文化協會的理事，也捌加入台灣頭一个政治結社「新台灣聯盟」。自1925年到1926年佇《台灣民報》發表頭一篇散文〈無題〉，發表頭一首新詩〈覺悟的犧牲〉佮頭一篇小說〈鬥鬧熱〉，紲積極投入台灣新文學的創作佮運動。1926 年以後主持《台灣民報》文藝欄，培養濟濟新文學作家。1932年佮葉榮鐘、郭秋生等人創辦《南音》雜誌，鼓勵作家用台灣話文寫作；戰後予人稱做「台灣新文學之父」。
陳明仁
1954年出世，彰化二林人，捌用Silaia、Babuja. A. Sidaia、Asia Jilimpo 等筆名，表明成做平埔族後代的認同感；也有用A-jîn、阿仁等筆名發表文章。1988年擔任政論雜誌《深耕》編輯的時坐監，期間熟似台獨案政治犯蔡有全佮許曹德，開始有母語意識、學白話字佮台語書寫。佇台語文學猶是拋荒時期的1990年代，就全力投入台語文學運動；參與「蕃薯詩社」，也擔任過《台文通訊》的台灣總聯絡人之一佮《台文BONG 報》主編。出版《流浪紀事》、《A-Chhûn》、《走找流浪的台灣》、《陳明仁台語文學選》、《拋荒的故事》等濟濟台語小說、劇本、故事、詩文作品。
陳雷
1939年出世佇南京，戰後轉來台灣入台北西門國校，國校五年才轉台南。本名吳景裕。台大醫學院畢業，捌佇美國做實習醫師，紲佇加拿大多倫多大學提著免疫學博士學位，到今猶佇加拿大做醫生。1988年出版的《百家春》是台灣頭一部關係二二八的小說集。自1987年開始用台語寫作，是1991年佇美國發刊的《台文通訊》共同發起者；到今已經寫作上百篇的台語小說。主要的作品集包括《陳雷台語文學選》、劇本《陳雷台灣話戲劇集》，小說有《阿春無罪》、《無情城市》、《永遠ê故鄉》、《鄉史補記》、《白色ê甘蔗園》等等。
王貞文（1965-2017）
嘉義人，出世佇淡水。東海大學歷史系畢業，台南神學院神學系道學碩士，捌佇德國畢勒伯特利神學院神學博士班修業；台灣基督長老教會牧師。長期研究教會史佮女性神學，也積極參與亞洲婦女資源中心（AWRC）的相關工課。捌用偉海、吳理真、綠鷹、綠茵等筆名發表過文章，出版過《海邊的粿葉樹》、《求道手記》、《橋上來回》、《控訴與紀念》等7部華語作品集。佇1994年的德國留學期間，開始用台語創作小說佮現代詩。2006年出版台語小說集《天使》，2015年出版台語詩集《檸檬蜜茶》。
胡長松
胡長松，1973年出世，高雄市人，清華大學資訊科學研究所畢業。第38 屆吳三連獎文學獎得主。1995年開始創作文學，2000年開始用台語寫作小說佮現代詩，也參與發起「台灣新本土社」，擔任《台灣ｅ文藝》總編輯。全力佇推捒現代台語文學的運動，現任《台文戰線》雜誌社社長。出版過華語小說集《柴山少年安魂曲》、《骷髏酒吧》等，以及台語詩集《棋盤街路的城市》、《台灣我的祖國》。另外出版《槍聲》、《燈塔下》、《大港嘴》、《金色島嶼之歌》、《復活的人》、《幻影號的奇航》等短篇佮長篇的台語小說集。
胡民祥
1943年出世，台南善化人；目前定居北美洲匹茲堡郊區。台灣大學機械工程系畢業，紐約州立大學水牛城分校機械工程博士。捌以許水綠、許石竹、李竹青、莊家蘭、莊家湖、簡水藍、曾文郎、胡敏雄等筆名發表作品。自1967年到北美洲留學期間參與海外台灣人運動，予人列入烏名單，1988年才頭擺轉來台灣；1986年開始用台語寫作，1987年發表〈華府牽猴〉，成做戰後頭一篇用台語漢字寫作的台語小說，是台語文學理論重要的起造者。捌參與發起「蕃薯詩社」，也擔任過美國《台灣公論報》副刊編輯。是《台文戰線》的創社社員佮社務委員。出版過《胡民祥台語文學選》、《茉里鄉紀事》等濟濟作品集。
陳正雄
1962年出世，台南柳營人。台灣師範大學公訓系畢業；台南一中教師退休。1998年開始用台語寫詩，紲投入台語文教學佮台語文學創作的事工。捌擔任菅芒花台語文學會理事、《菅芒花台語文學》副主編；現時是台文筆會理事長。捌得著鹽分地帶文學獎、府城文學獎、南瀛文學獎、海翁台語文學獎、教育部文藝創作獎、台南文學獎等濟項。出版《故鄉的歌》、《風中的菅芒》、《失眠集》、《戀愛府城》、《白髮記》等台語詩集；2021 年出版頭一部台語小說集《灶雞仔》。
藍春瑞
1952年出世佇台北雙溪，東吳大學畢業。捌去公所、農委會的試驗單位、國中、病院佮工程機關食頭路，佇四間高中服務過；做公務人員欲倚35 冬；現此時退休蹛佇雲林古坑。捌得著海翁台語文學獎、阿却賞Holo小說頭賞、教育部母語文學創作獎等獎項。出版過台語小說集《無影無跡》、《奪人ê愛》。
林美麗
1965年出世佇屏東，捌蹛過工場，也捌佇菜市仔賣果子。2003年成做台語老師了後，才開始創作台語文學。捌得著府城文學獎、教育部母語文學創作獎、台南文學獎、阿却賞台語文學獎等獎項。2011年提著成功大學台灣文學的碩士學位，2016年出版台語小說集《八卦紅之心》，2019 年出版台語散文集《石頭縫的幸運草》；現此時是中小學的母語教師。
王羅蜜多
王羅蜜多，1951年出世，台南人，本名王永成。淡江文理學院中文系畢業，南華大學宗教學碩士。佮意讀心經，定定予王羅佮蜜多進行內在世界的對話；畫作也受國內外袂少人收藏。捌得著台文戰線文學獎、教育部母語文學獎、台南文學獎、桃城文學獎、台灣文學獎等濟項。出版過詩集《問路 用一首詩》、《颱風意識流：王羅蜜多新聞詩集》、《王羅蜜多截句》、《鹽酸草》、《日頭雨截句》、《大海我閣來矣》；頭一本台語小說集《地獄谷》佇2022 年出版。
編者簡介
呂美親
清華大學台灣文學所碩士，日本一橋大學言語社會科博士，現此時是台灣師範大學台灣語文學系助理教授。捌得著吳濁流文學獎新詩正獎、台南文學獎台語小說佮台語詩首獎、打狗鳳邑文學獎台語詩首獎、台灣文學獎創作類台語散文金典獎等濟項。也捌參與製作賴和文學音樂專輯《河》、共編《台語文運動訪談暨史料彙編》、出版台語詩集《落雨彼日》、編譯《漂泊的民族：王育德選集》。主要的研究領域是佇台灣世界語運動史、東亞語文改革運動、台語文學等。
天天爆殺 
今日66折 
博客來
博客來
博客來
博客來
博客來
常見問題
線上客服
客服信箱
