最後的烏雲豹（台語兒童公民繪本微動畫5）

這是一个關係信念的故事。
 
有一隻家己蹛佇樹林仔內的細隻烏雲豹，叫做烏雲。伊肨奶（hàng-ling）的喙䫌定定牽目屎痕，因為𪜶（in）媽媽彼日離開去拍獵就無閣轉來矣。烏雲感覺真孤單，盤山過嶺想欲揣𪜶家族仔的親人，煞揣攏無。
 
有一日，烏雲看石虎媽媽𤆬兩隻石虎仔囝咧散步，看𪜶和樂的模樣予伊足欣羨。伊向頭（ànn-thâu）看家己身軀的花草，佮石虎的有淡薄仔仝款，想著一步，欲加入石虎這口灶。伊就刁工去學石虎的叫聲，共家己激做一隻石虎。
 
其中一隻叫做阿石的石虎遠遠聽著伊咧叫，問伊講：「欸，雖然你的叫聲有淡薄仔親像石虎，但是你應該毋是乎？」
 
烏雲想袂到家己一聲就予人看破，伊輕聲應講：「我敢激了無親像石虎？按呢好，其實我……我是一隻烏雲豹。」
 
阿石共烏雲講：「烏雲豹足嫣的，誠威風呢。」
 
烏雲煞目箍紅，講：「這款干焦家己孤身咧度日子，講家己才聽有的話，其實是真寂寞。」
 
阿石是真正同情烏雲，煞也只會當遠遠共頕頭，予伊安慰，了後就佮親人愈行愈遠，消失佇烏雲所徛起的這片樹林仔內。