福摩思探偵案精選（台英雙語．附台語朗讀）

編者簡介

陳麗君（主編，計畫主持人）

　　國立成功大學台灣文學系教授。新營人。專長領域是台灣原住民、新住民、台語族群等跨族群、語言的社會語言學現象kap教育政策研究。編著《台語ABC真趣味》、《台語拍通關》、《亞洲婚姻移民女性》、《新移民、女性、母語ê社會語言學》等專書。

邱芊樺

　　國立中央大學中文系學士、國立政治大學台灣史研究所碩士，台灣文史主題書籍編輯。

繪者簡介

鸚鵡洲

　　擅長繪製漫畫／插畫，參與台灣獨立遊戲《OPUS：龍脈常歌》遊戲美術製作，與原著薛西斯合作漫畫作品《不可知論偵探》。近期目標是去南極被企鵝圍繞。

朗讀者簡介

徐智崗（福摩思）

　　桃園人，高中老師，英語教25冬，有考過台語認證，現此時有咧學校教台語。賰ê人生欲決心推捒台語文復振。

賴嘉仕（口白、華生、加夫利）

　　嘉義人，20幾冬ê台語廣播資歷，2018年提著廣播金鐘獎，現任曾文溪電台台長、「戀戀曾文溪」節目主持人。

有聲朗讀｜Soo Kái-Uí（國王/波希米亞ê見笑代、雷醫師/點仔帶奇案）

　　屏東人，兼職配音員，愛看布袋戲，通過教育部台檢C1，感覺羅馬字袂輸武俠內功，學予好才通拍通台語ê筋脈。

陳椘芸（愛綾/波希米亞ê見笑代）

　　自細漢就開始講台語，二十二歲ê大學生。兩冬前接觸劇場，ná做演員ná做台語ê藝文工作者。

劉雨青（史海蓮、路人甲/點仔帶奇案）

　　故鄉台中霧峰，工作是配音、配唱、和聲，嘛是實況主，足愛對無仝歌曲佮角色ê角度去體驗無仝ê故事佮人生。

發音指導者簡介

Gina

　　台語花田ê choh-sit人。台南市國小台語教學20 thóng年，國中台語教學10外冬。

校對者簡介

謝惠貞

　　台南人，tī國小教台語，向望透過教學會當hōo lán ê囡á愛講台語，hōo台語繼續流傳--落去。

蘇凰蘭

　　臺東大學華語系副教授。美國Illinois University at Urbana-Champaign東亞語言文化博士。高雄人。學術興趣是新語者kap母語教育、雙語讀寫、語言學習動機kap跨語言實踐。

譯者簡介

朱志煒

　　屏東人，袂曉注音輸入法。用行列輸入法拍漢字，台羅用PhahTaigi kah教育部ê。手機仔、平枋kah電腦ê介面lóng是日文。教育部台檢C2專業級、成大台檢C1高級，研究所讀應用外文系，英文論文ê摘要kah謝辭用台文寫，凡勢是屏科大頭一篇有台文ê論文。高中、國中台語教師，99.9%用台語講課。Tī SNS lóng是寫台文，2012年以後blog改用台語文書寫，一直到tsín。

邱偉欣

　　新竹出世ê高雄人。台語雖然是母語，煞因為國民教育ê關係，險險就袂曉講。經過十冬ê時間，總算koh會使用輾轉ê台語佮世界對話。本業是生命科學，2013年開始tī《台文通訊BONG報》寫科普專欄，2021年kā德文翻譯做台文ê《你無聽--過ê格林童話》出版，2023年熱天tī成功大學台灣文學系提著文學博士ê學位。用母語過生活，也有科學，也有文學，實在是tsìnn主流koh天公地道ê得意生活。

紀品志

　　語文工，有口筆譯、語言學、語文教學ê資歷。學生時代對語言有趣味，tī台大讀農業化學ê期間接觸著語言學、語言教學kap台灣語言研究，後來去荷蘭Leiden大學讀語言學碩士，食頭路幾冬後koh學口譯。Tsit-tsūn是加拿大CTTIC、ATIO翻譯協會認證合格ê英中文書翻譯，也tī病院、學校、社福單位做通譯。2013年起參與台文社群，兼做教學、翻譯、編校、語料處理、錄音、演講、主持等等ê台語工。多倫多台灣語文中心講師、Bite-size Taiwanese共同創辦人兼英台雙語教材編校。出版著作有《Short Takes: A Scene-based Taiwanese Vocabulary Builder》。

波希米亞ê見笑代
 
I
 
對謝樂．福摩思（Sherlock Holmes）來講，伊一直lóng是hit个女人。我罕得聽福摩思用別ê名講著伊，在福摩思看--來，伊ê才能超越女性而且hōo女性tsit款性別分類失去意義。M̄是講伊對愛綾．愛德勒（Irene Adler）有愛情tī--leh，所有ê感情，特別是愛情hit款，lóng是伊冷靜、精確、絕對無偏失ê心智所無愛--ê。我ē-sái理解，伊是全世界揣無--ê，上蓋頂真ê觀察kah推理ê機器。M̄-koh，若是做人ê愛人仔，伊談戀愛ê話語百面ē hōo人誤解，伊m̄ bat講溫柔ê情話，suah kan-ta是khau洗、供體。Ē-sái kā人歹心行ê動機kah行為拆白，確實是觀察者hōo人欽佩ê能力。是講，若hōo感情走入去一个有訓練、有專業ê推理者ê心肝頭，就bē輸tī伊幼路koh斟酌ê氣質內底，引進一項造成擾亂ê因素，伊所有ê心理成果lóng ē出現無確定。對伊tsit款性格ê人來講，強烈感情tī心肝內底並精密儀器--裡ê沙屑──伊一台高功率hàm鏡出現ê必巡，koh-khah hōo人感覺不安。Tī福摩思已經無清楚ê記持內底，hit个已經過身--去ê愛綾．愛德勒，就是唯一ē hōo伊感情起波湧ê人。
 
Tsit站仔我真少看見福摩思，自我結婚了後阮就khah無teh往來。對我án-ne ê查埔人來講，第一擺建立家己ê家庭，感受著圓滿ê幸福kah趣味就有夠滿足，thang hōo我規心注神--ah。M̄-koh福摩思伊有放浪ê