我聽著花開的聲：台語散文集（附全書有聲朗讀QRcode）

行入冊店
 
Tso̍h--ji̍t1 beh 暗仔，因為淡薄仔代誌去台北，拄好有1寡làng-phāng 的時間，1个人坐佇公園歇睏。Hiông-hiông想著最近冊店1間1間相接紲收起來，感覺誠可惜，就Google上近的冊店，查著附近有1間開40 年的傳統冊店，5分鐘會當行跤到，就散步沓沓仔行過--去。
 
哇！有影是傳統的老冊店，我kán-ná nǹg過時空pōng-khang，轉去虎尾公車站邊仔彼間冊店。彼陣，我是1个為文學痴迷，食冊就會飽的高中生，差不多逐工放學攏會uat入去彼間冊店，關心看有啥物新冊出世，雖然lak袋仔不時空空，厝裡散kah giōng-beh予鬼掠去，阮嘛是勻勻仔儉錢，等夠額就交予冊店頭家，歡歡喜喜kā冊架仔頂的冊紮轉去。M̄-koh，閣khah濟的時陣是1箍人徛佇冊店的角--仔，看冊看規晡，尾--仔無買冊，就家己歹勢歹勢恬恬仔走，頭家嘛m̄-bat予阮歹面看。
 
離開冊店，坐uànn-pang的台西客運轉去厝。我佮意坐佇倚窗仔，會當看黃昏的田園，看各種農作物佮彎彎uat-uat的小路，沿路thàng去1 个閣1个庄頭。有時我會想像作家學長「林雙不」讀虎尾高中的時，坐台西客運看著、聽著的是啥物風景？佮伊坐仝pang車，彼个手phóng鼓吹花、穿lá-pah褲離家出走的查某囡仔，uì主張免讀大學嘛過了誠好，到認真讀冊考大學，家己轉變嘛鼓勵伊按呢，kám正港有彼个人？Ah是作家家己進行的1場思辯？伊偷走書去虎尾溪poh岸邊、糖廠、公園、一等涼冰果室……，四界lōng-liú-lian，茫茫渺渺看無家己的未來，升學主義壓迫少年囡仔敏感、ke̍h-kuāinn的心，阮熟似的環境佮苦悶的心境完全予伊寫透機。當伊佇阿里山天星陪伴伊寫情批予愛人仔，阮嘛綴咧幻想：有1工，kám 有人會寫按呢的批予阮？