我隨意，你盡量
 
Guá suî-ì, lí tsīn-liōng
 
淡水三芝的山，崙仔一條過一條，逐條配一逝「北」字頭編號的鄉道，鄉道邊的叉路，好奇共弄入去，三彎兩斡，落崎peh崎 ，無定一片 相思仔林，也是一兩窟埤仔、幾坵坪仔田，閣較偏僻的角勢，嘛凡勢有人徛。
 
拄到淡水彼當陣，有一回，綴人去夆 請，聽講是有拜拜，辦桌請下昏時。彼工，山路暗挲挲才咧摸無，懷疑敢會揣毋著位，佳哉，無偌遠的頭前面，電火泡仔光焱焱，有人咧辦喜事的鬧熱氣，應該就是遐。
 
揜貼的山坪，干焦徛𪜶這幾戶，攏仝姓的宗族仔。門口埕闊閬閬，排欲幾若塊大圓桌，專工請廚子師來咧煮，才開始出菜爾，好運予阮赴著開桌。彼个年代，去餐廳訂桌算普遍矣；較無遐都市的鄉鎮，嘛閣會閘街仔路做攤；庄跤人家己有所在的，就踮家己的埕裡請。是我無見過世面，猶毋捌來到遮草地的。
 
傍朋友的福氣，朋友的同窗淡水在地人，咱一个生份的外客，才有機會鬥鬧熱。實在失敬，hín連人是迎佗一位神明都毋知，大面神，就綴人去食腥臊，尾手到當時仔才咧想，彼改拜拜，應該是舊曆三月十五，大道公生。
 
食這款人拜拜迎鬧熱的桌，氣氛佮去食人嫁娶的喜酒無siāng。喜酒的主角是新人，紅包包偌濟有禮數，閣較會堪得啉，總是人情世事陪綴，後日仔敢免還？——神明生咧請人客，彼就無仝矣，主人家誠心謝神，冇手甘開，無咧放帖仔，一句「來𨑨迌！來予阮請！」，來就知影，一个地方的民風佮真情。
 
佇阮屏東，東港王爺公廟三年一科迎王、燒王船，是上鬧熱的，可惜我東港無朋友，從做囡仔上蓋欣羨同學會當去東港夆請。阮潮州的三山國王廟佮榕仔王公，嘛是三年迎一擺，阮兜猶徛舊街的時，王爺公迎鬧熱嘛捌咧請--人，足久以前的代誌矣。
 
淡水佮阮潮州仝款，自早攏是「鎮」，「鎮」的中心定著有大廟，嘛定著有起基的舊街。淡水鎮內的媽祖廟（福佑宮）、清水祖師廟、龍山寺，攏誠有歷史，長老會的教堂真出名——遮的好所在，對我一个來淡水讀大學、出業閣繼續寄跤無搬走的人，心肝底總是有一跡皺皺熨袂平：彼是正淡水人的淡水啊！彼嘛是觀光客的淡水。