阿亮𪜶阿公共人買的，是人去標著的、報廢的飛行機，阿公親身對台北𤆬工人到宜蘭，踮南機場現處理，規大堆刣肉了後的a-lú-mih鉼，攏著先靠人工鏨斷剁碎，規批廢料才有法度配火車，運到台北華山車頭落貨，才倩lî-á-khak車轉去厝，𪜶阿公就自這批對日本飛行機拆落來的a-lú-mih做原料，鑄鍋仔去賣。「a-lú-mih」的台灣話叫「輕銀」，「輕」是伊的特性。我細漢猶真捷聽著「輕銀仔」，「彼个sui̋-tóo輕銀仔的，蓋勇！」彼時的「勇」是佮塑膠製的比。拄上市的輕銀鍋仔是佮鉎鍋比，輕銀鍋仔厚罔厚，加真輕嘛加真勇。戰後的台灣閣較歹過日，人家逐工總是著煮三頓，一坩好用的鍋仔鼎真要緊，郭家的輕銀鍋仔踏著時機，銷路有敨，家業對這項產品來起基興旺。
 
透過一支紀錄片，欲走揣一九四六年宜蘭南機場無--去的日本飛行機——到底總共有幾台？那會遐緊就報廢？拋荒的機場賰跑道一節仔，閣會當揣著啥？
 
阿亮佮我，攏是學校無教台灣史的時代大漢的。我升高二的歇熱，台灣才解嚴，九○年代的大學校園猶閣有職業學生，不而過若欲組讀冊會、欲讀啥物冊，是已經有自由矣。一个大學生佇大學以前的人生目標，就是欲考大學爾，可比好好一雙會行會走的跤，去學校予老師共跤盤拗折，跤帛纏了摧閣再摧，縛甲一雙跤變形細細瓣，穿會落「大學」這雙有通共別人展的繡花鞋，望欲後日仔出社會做娘毋免做𡢃。求學的目的毋是求真知，睏無飽眠的精神攏用對記標準答案。啥物冊會當讀，讀啥物冊有危險，啥物款學生是模範，一雙看袂著的目睭隨時咧拍分數。
 
等到有讀冊的自由彼時，無一定就有讀冊的胃口；有彼个胃口佮喙斗，嘛著愛有夠額的糧食。台灣文史的冊，一本一本出版，無網路的時代，除了圖書館借，就是愛靠踅冊店，水源街淡江邊仔門對面的知書房，是彼幾年我揣食的灶跤。生活費用家己趁，買冊冇手無人會唸。暗時誠交易的水源街，有時會有專門排「匪書」出來賣的冊擔，電火泡仔下底一塊簡體字的孤島，無人會閣因為沐著遐的冊，夆送去火燒島。